Movimentu Libertasaun: Ami apoio maun Xanana ba Primeiru Ministru

Dili. Wainhira dada lia ho Koordenador Geral organizasaun Movimentu Libertasaun Sr. Acacio Maubere Soares iha nia knaar fatin hateten katak “Ami apoio maun Xanana Gusmao atu ba Primeiru Ministru (PM) ba periodu ida tan mak 2012 – 2017.

Koordenador Geral ne’e hateten katak laiha dalan seluk ba ami, dalan mak ne’e Apoio maun Xanana Gusmao ba Primeiru ministru V Governu konstitusional. Nia hatutan liu tan katak hamutuk ho Maun Xanana mak sei bele lori dezenvolvimentu ba rai no povo ida ne’e.

“Ita hotu hare no akompanha maun Xanana nia mehi no nia programa, mehi ida nebe nia iha desde uluk kedas, desde uluk sei iha rezistensia nia laran. Mehi katak povu Timor Leste sei hetan moris diak iha loron ruma”.

Koordenador ne’e hatutan liu tan katak ukun an tinan 10 ne’e ita bele konsidera hanesan faze hari fundasaun nasaun nian. Maski buat barak lao tiha ona iha Governasaun AMP iha Maun Xanana nia Lideransa mais mudansa ida nebe tarde tamba tenke preokupa ho problemas oin-oin nebe mosu iha ita nia rain, ida nebe obriga atensaun masimu governu ne’e nian. Tambe ne’e ami hanoin katak ho tinan 5 mai oin, maun Xanana tenke sai PM para dudu lalais dezenvolvimentu ida nebe ita hotu hakarak ba povu no nasaun ida ne’e.

Wainhira husu konaba iha karik posibilidade atu Partidu CNRT hetan votus maioria absoluta iha Eleisaun Parlamentar, Koordenador ne’e haktuir tan katak “target mak ida ne’e duni, CNRT sei manan maioria iha eleisaun parlamentar, mais se laheten maioria karik diak liu buka deit partidu kiik ida para halo koligasaun nune’e bele asegura maioria iha Parlamentu para lori realiza planu Estrategiku nebe nia lori lao haleu Timor Leste.

“Tempu mak periodu ida ne’e 2012-2017. Tamba maun Xanana uluk preokupa ho problema nasaun nian barak iha tinan 5 kotuk, no agora mak tempu diak atu konsentra diak liu tan para dudu lalais dezenvolvimentu ida nebe Povu no Nasaun hein hela. Tamba ne’e mak ho determinasaun tomak ami hamriik para suporta maun Xanana ba PM. (JC)