FO-LARAN: PARTIDU CNRT, PARTIDU POVU TOMAK NIAN

Dili; Adjuntu Sekretariu Geral Partidu CNRT, Sr. Jose da Silva “Fo-LARAN” hateten katak Partidu CNRT, Partidu Povu Tomak nian. Tamba Partidu CNRT moris iha momentu  ida nebe povu Timor Leste hasoru situasaun susar, situasaun ida nebe nakonu ho matawen nebe obriga Timor oan sira rihun ba rihun mak halibur sira nia kartaun eleitoral hodi regista Partidu ida ne’e moris iha momentu ida neba. Fo-laran, hateten lia hirak ne’e iha konsolidasaun Partidu CNRT nian nebe halao iha loron Sabadu, 26 de Maio 2012 iha Suku Lahane Osidental, Aldeia Ainitas-hun. 

“Iha Outubru 2006, iha Dare, Iha ita bo’ot sira nia area duni, mak ami lubuk ida halo reuniaun hamutuk ho maun bo’ot Kayrala Xanana Gusmao depois de rona povu nia preokupasaun, povu nia sofrimentu, povu nia halerik nebe ezizi atu maun bo’ot bele hamriik hikas fali hodi hamaran sira nia matawen no hapara sira nia terus.” Ho ida ne’e maka ema rihun 6 (neen) resin iha teritorio laran tomak fo sira nia kartaun eleitoral hodi regista mak Partidu CNRT moris iha momentu ida neba.

Adjuntu Sekretariu Geral ne’e hatutan liu tan katak, maski iha tinan 5 iha Governasaun AMP, Partidu CNRT mak lidera, maibe ita bo’ot sira persiza hatene katak iha Partidu 5 kedas mak hamutuk iha Aliansa ida, iha hanoin no hakarak ketak-ketak, ita la konsege implementa programa no visaun CNRT nian ho diak. Nune’e husu ba imi tomak, atu fo konfiansa ba Partidu CNRT, hodi hakat mesak ba Governu lebele bolu tan ona AMP, se bele bolu deit ona Governu CNRT nune’e bele implementa programa no visaun nebe define ona, hodi lori dezenvolvimentu ba nasaun no povu ida ne’e.

“Partidu CNRT laos maun Xanana nian, laos Sekretariu Geral nian, maibe povu Timor tomak nian, tamba husi ita bo’ot sira nia halerik no matawen mak lori Partidu ida ne’e hari. Mai hamutuk ho CNRT, hamutuk ho maun Xanana hodi lori dezenvolvimentu ba povu no rai ne’e”. (JC)