Dili-Primeiru Ministru (PM) Kay Rala Xanana Gusmão, hateten Museu hanesan fatin atu aprende Espiritu sakrifisu nebe funu nain sira hatudu hela ba povu, liu-liu jovem sira, katak antes Timor Leste Ukun A’an, ferik katuas sira uluk halo duni buat ruma ba nasaun foun ne’e.
PM Xanana iha nia deskursu wainhira partisipa iha seremonia inagurasaun Arquivo no Museu Resistensia Timorense, husu ba entidade hotu atu nafatin fo apoiu ba fatin memoria ne’e, tamba fatin ne’e hanesan fatin istoriku ba povu Timor tomak.
“ Museum laos loke ohin, ka taka aban, museum ne’e ita nian, arquivo ne’e ita nian. Hau sei husu ba hotu-hotu nafatin, iha karik surat, iha krik fotos, iha karik buat ruma konaba ita nia resistensia, odamatan mak ida ne’e,” hateten PM Xanana, Dominggo (20/5) hafoin akompanha Prezidenti Republika Taur Matan Ruak, Prezidenti Portugal Anibal Cavaco Silva, inklui bainaka seluk husi estranjeiru, inagura Arquivo no Museu Resistensia Timorense.
Tamba ne’e dala ida tan PM Xanana husu ba entidade hotu nebe momentu ne’e, seidauk bele asesu ba edifisiu Arquivo no Museu Resistensia laran, atu lalika laran taridu tamba Museu ne’e sei loke ba publiku hafoin seremonia inagurasaun, ho prezensa katuas ferik sira ohin loron iha ne’e, fo onra bot ba rai doben Timor Leste, ba povu tomak. Tuir ajenda Museu Resistensia sei loke ba publiku iha loron Segunda Feira to’o Sabado ho oras tuku 09:00 to’o 17:30 otl.
Museu da Resistensia ne’e mos sei rai dokumentus hamutuk rihun atus ida, husi dokumentus Resistensia Timor nian. Dokumentus hirak ne’e kompostu husi Fotografia, livru, inklui dokumentus digital hanesan video balun. Arquivo nebe rai iha Museu laran maka hanesan kilat, pistol, farda, radio bo’ot no ki’ik, Estatua, no dokumentus inklui fotografia seluk. Iha museu laran mos rai arkitektu fatin subar PM Xanana.
Hafoin seremonia inagurasaun konvidadus hotu nebe marka prezensa iha seremonia ne’e, delegasaun sira husi Republika Portugeza, Indonezia, Nova Zelandia, no Australia, inklui membru governu no deputadu sira hetan oportunidade atu vizita Arquivo no museu laran. Informasaun kompletu iha STL Jornal no STL Web, edisaun Segunda (21/5). Josefa Parada/Prizaldo Almeida
Tidak ada komentar:
Posting Komentar