DEONISIO BABO: CNRT IDA AGORA MAI HUSI CNRT IDA ULUK

Dili; Iha konsolidasaun Partidu CNRT nian iha Suku Lahane Osidental Sabadu, 26 de Maio 2012,  sekretariu Geral Partidu CNRT DR. Deonisio Babo hateten katak, Iha Partidu CNRT ida uluk nia mahon mak ita liberta ita nia rai, hamutuk ho CNRT ida agora ita liberta ita nia povu. CNRT ida uluk nudar Concelho nebe halibur Timor oan sira hodi liberta ita nia rai, CNRT ida agora nudar Partidu nebe bolu Rekonstrusaun, atu rekonstroi hikas Timor Leste hodi liberta ita nia povo.

Sekretariu Geral ne’e hatutan liu tan katak, maun Xanana nudar lider Resistensia nian, mak halo mudansas oin-oin durante resistensia, husi CRRN, ba CNRM ikus mai CNRT mak iha 1999, ita deside nasaun nia vida.

“Ideia halibur Timor oan sira mai husi kedas Resistensia, husi lider Resistensia nian Kayrala Xanana Gusmao. Husi nia mak mosu mudansas Estrategiku oin-oin husi CRRN, CNRM ikus mai CNRT nudar concelho unidade nasional nia mahon mak ita duni Bapa Sai husi Timor.” Sekretariu Geral ne’e haktuir.

Deonisio Babo mos hateten liu tan katak “Mai ita hamutuk ho CNRT ida agora, nebe ho programa no vizaun klaru ba Nasaun no povu atu liberta ita nia povu. Se uluk ita Fiar An hakat ba oin hodi deside ita nasaun nia vida, agora tenke Fiar An atu deside futuru ita nia nasaun nian liu husi Partidu CNRT. Futuru ida nebe ita mehi, futuru ida nebe CNRT mehi mak atu kria kondisaun hotu-hotu ba ita nia labarik sira hodi moris hakmaktek agora no ba oin”.

“Iha tinan 5 nebe ita liu dadaun, ita bolu periodu de Estabilizasaun, katak periodu ida nebe ita buka atu estabiliza situasaun, tamba ita hotu hatene katak ita hasoru situasaun ida nebe susar teb-tebes, povu barak mak halerik, tanis no iha situasaun sofrimentu nia laran, tamba ne’e mak ita buka kria paz no estabilidade. Lori uluk hakmatek ba ita nia povu. Tamba ne’e ita hotu bele senti hakmatek, ita nia labarik sira mos sinti hakmatek iha liuron no iha Estrada durante tinan 5 nia laran”. Babo haktuir.

Ba oin, CNRT nia programa importante 10 nebe ita bolu ukun fuan 10 Partidu CNRT nian, nebe baze iha Planu Estrategiku Dezenvolvimentu Nasional. Programa hirak ne’e mak hanesan: 1). Infrastrutura Basiku, 2). Hadia Ekonomia Povu nian, 3). Tau Matan ba Setor Privadu, 4). Rekursu Humanus/Forma Timor oan sira, 5). Administrasaun Publika, 6). Programa Desentralizasaun, 7). Tau matan ba Setor Justisa, 8). Inklusaun Sosial/idozus, aleizadus, veteranus no antigus kombatentes sira, 9) Paz no Estabilidade, 10). Relasaun Internasional. Fiar katak, Wainhira CNRT kaer ukun iha tinan 5 nia laran, planu hirak nebe temi sai iha leten sei bele lori lori povu sai husi kiak no mukit. (JC)