"Xanana: CNRT Mosu Atu Tau Matan Ba Povu Nia Moris"

Notisia Husi TVTL - Kinta Kalan, 07 Junu 2012

Veteranus, Faluk, oan kiak, Joventude no unidade nasional sai programa prioridade ba CNRT wainhira manan iha eleisaun Parlamentar.

Kay Rala xanana Gusmao hato’o asuntu ne’e, wainhira hala’o kampania ba terseiru dia iha Distritu Baucau.

Perante militante no simpatizantes iha Stadion Fotbal Distritu Baucau, Prezidenti partidu CNRT Kay Rala Xanana Gusmao hato’o nia komprimisiu politiku hodi enkoraza militantes, no simpatijantes sira hodi vota ba CNRT ho numeru sorteiru 11 iha eleisaun lejislativa tinan ida ne’e.

Kay Rala xanana Gusmao hateten, ukun aan kuandu laiha unidade nasional Timor-Leste sei lakon nia dignidade, tamba nasaun ne’e hamrik husi ruin no ran povu Timor-Leste tomak.

"Bainhira populasaun tun mai vila laran ho terus nafatin, ho mate, ho hamlaha, mate tamba moras, ami iha ai-laran, ami hanoin katak saida maka ita nia kbiit, saida maka ita nia frakeiza, istoria funu beiala sira nia dehan, bainhira ita la hamutuk, sira kaer reinu ida ba alakon tiha," dehan Xanana.

Nu’udar rejistensia masimu, Kay Rala Xanana Gusmao hateten, programa perioridades ne’ebe presiza tau matan mak , veteranus, faluk , ona kiak, ferik katuas, inklui joventude hirak ne’ebe to’o agora seidauk iha servisu.

"CNRT la buka buat oioin, CNRT buka atu hatene nesesidade Povu nian, nesesidade joven sira nian, nesesidade distritu sira nian, nesesidade suku sira nian, nesesidade sub distritu sira nian, para ukun ne’e labele husi Dili deit maka mai, katuas ferik sira balun seidauk simu, veteranu sira balun seidauk simu, buat oioin, labarik sira, joven sira seidauk servisu," deklara Xanana.

Kampania iha distritu Baucau ne’e hetan apoiu husi grupu ne’ebe anaran an FRETILIN Rejistensia no militante balun husi Partidu ASDT.